A Plataforma Galega de Voluntariado segue avanzando no seu proceso de consolidación como rede autonómica de referencia da acción voluntaria en Galicia. Un mes despois da súa constitución oficial, a PGV dá un novo paso adiante coa incorporación de dúas novas entidades, que se suman a este proxecto colectivo desde ámbitos e realidades diversas, sendo 23 organizacións neste momento.
Na última Asemblea Xeral, aprobouse a adhesión de:
- FEGAUS – Federación Galega de Asociacións Universitarias Séniors, entidade de referencia no ámbito do envellecemento activo, a participación social das persoas maiores e a aprendizaxe ao longo da vida.
- Amigas da Terra, organización ambientalista con ampla traxectoria na defensa do medio ambiente, a xustiza social e a participación cidadá.
A súa incorporación reforza o carácter plural, diverso e interxeracional da Plataforma Galega de Voluntariado, ampliando as miradas e os ámbitos de intervención representados na rede, e fortalecendo a capacidade da PGV para dar resposta aos retos sociais, ambientais e comunitarios actuais.
Desde a PGV celebramos que entidades con traxectorias tan consolidadas decidan sumarse a este espazo común, baseado na cooperación, no respecto á diversidade e na defensa dunha acción voluntaria ética, transformadora e comprometida coa sociedade galega.
A Plataforma Galega de Voluntariado continúa así a súa andaina como un proxecto aberto e en construción permanente, que seguirá medrando coa incorporación de novas entidades e coa participación activa de todas aquelas organizacións que cren no voluntariado como ferramenta de cambio social.